Londonda Azərbaycanın musiqi irsini təcəssüm etdirən konsert təqdim edilib

Londonun məşhur “St. John's Smith Square” konsert zalında “İpək Yolu Serenadası – Azərbaycan Musiqi İrsi” adlı konsert keçirilib.

Britaniya Azərbaycan Cəmiyyətinin təşkilatçılığı ilə baş tutan tədbirdə diplomatik korpusun, yerli ictimaiyyətin, ölkəmizə dost icmaların nümayəndələri və soydaşlarımızdan ibarət 500-ə yaxın tamaşaçı iştirak edib. 

Konsertdə dünya şöhrətli cazmen, Azərbaycanın əməkdar artisti Elçin Şirinov, beynəlxalq müsabiqələr laureatı Vüsalə Babayeva, bəstəkar və musiqiçi Arzu Abbasovanın ifasında görkəmli Azərbaycan bəstəkarları Üzeyir Hacıbəyov, Fikrət Əmirov, Cahangir Cahangirov, Tofiq Quliyev,Vaqif Mustafazadə, Faiq Sücəddinov, eləcə də Sevda Məmmədli, Arzu Abbasovanın əsərlərindən və xalq musiqilərindən ibarət konsert proqramı təqdim edilib.

Tədbirdə çıxış edən Azərbaycanın Böyük Britaniya və Şimali İrlandiya Birləşmiş Krallığındakı səfiri Elin Süleymanov, Britaniya Azərbaycan Cəmiyyətinin rəhbəri Fəridə Pənahova və britaniyalı jurnalist-politoloq Neil Vatson qonaqlara Azərbaycan mədəni irsinin bəşəriyyətə verdiyi töhfələr, Azərbaycan musiqi sənətinin inciləri barədə məlumat verib, həmçinin ötən dövr ərzində Prezident İlham Əliyevin rəhbərliyi altında ölkəmizin əldə etdiyi nailiyyətləri diqqətə çatdırıblar.

2024-cü ilin xalqımızın həyatında yeni mərhələnin başlanğıcı və önəmli illərdən biri kimi tarixə düşəcəyini qeyd edən natiqlər 30 illik həsrətdən sonra ilk dəfə ölkəmizin bütün ərazisində Prezident seçkilərinin keçirilməsini mühüm tarixi hadisə adlandırıblar.

Britaniya Azərbaycan Cəmiyyəti adından xalqımıza qürur hissi yaşadan şəhidlərimizə, qəhrəman ordumuza və Ali Baş Komandana dərin minnətdarlıq ifadə edilib, qarşıdan gələn növbədənkənar Prezident seçkilərində səsvermə hüququ olan hər bir Azərbaycan vətəndaşına ölkəmizin müstəqilliyini, dayanıqlı inkişafını təmin edən liderə səs vermək çağırışı səsləndirilib.

Konsert proqramı tamaşaçılar tərəfindən alqışlarla qarşılanıb.